ગુજરાતી વાણી રાણીનો વકીલ

સ્વદેશ સુધારવાની  સભાનો  છું સભાસદ,
સુબોધક  સજ્જનોના  સાથમાં  સામીલ  છું;

ચૌટામાં લુંટાણી મહારાણી ગુજરાતી વાણી,
જાણી  તેનું દુઃખ ઘણો  દિલગીર  દિલ છું;

હિંદી ને મરાઠી હાલ, પામી છે પ્રતાપ પ્રૌઢ,
સ્વદેશી શિથિલ રહી,  તે દેખી શિથિલ છું;

કહે  દલપતરામ  રાજા  અધિરાજા  સુણો,
રુડી  ગુજરાતી  વાણી રાણીનો વકીલ  છું.

વાણી  ગુજરાતી  રૂડી રાણી  જાણી આજ,
હું વજીર  તેનો બની  કરું  તેનું શુભ કાજ.
-દલપતરામ