ખરીદો, ખરીદો, અમોલા કવન વેચવા છે

હૃદય રકતથી જેનું સીંચન કર્યું છે  એ જીવન ચમનનાં સુમન વેચવા છે
ખરીદો, ખરીદો, ઓ દુનિયાના લોકો! અમોલા અમોલા કવન વેચવા છે

ગરીબાઈની લાજ રાખી છે  જેણે  એ ધીરજના  છૂપાં  રતન વેચવા છે
કફનની  રહે  જોગવાઈ  એ  માટે  અમારે  અમારાં   જીવન વેચવા છે

ખરીદી  શકે છે કોઈ પણ જગતમાં  વિનિમયમાં આપી શકે  જો પ્રભુને
જે શ્રદ્ધાની  મોંઘેરી મૂડી સમાં છે  એ સઘળા અશંકિત નમન વેચવા છે

નથી  જોઈતી અલ્પતા  દેવગણની,  મળી  જાયે શંકરનું  ગૌરવ અમોને
એ ખાતર જીવનના બધા ઝેર સાટે આ બાકીનાં સઘળાં રતન વેચવા છે

કદરદાં ને દિલદાર કોઈ તો મળશે  નથી સાવ કૈં  લાગણીશૂન્ય દુનિયા
ફક્ત એક સંતોષનું  સ્મિત  રાખી   કરુણાના  સઘળાં  રુદન વેચવા છે
-‘શૂન્ય’ પાલનપુરી
ક્લીક કરો અને સાંભળો
આશિત દેસાઈની હૃદયસ્પર્શી રજૂઆતઃ