કોણ આ અગનબંધ બાંધે
મને ઘર બાંધે  મને વર બાંધે
મને  મૈયરની  મધુવેલ  બાંધે
ઓ રે સૈયરની સંગસેલ બાંધે

હાથે  કંકણ કંઠે નવસર
ચરણે ઓ  ઝાંઝર બાંધે

કમ્મરે  કાંધે  સાંધે સાંધે
આંખે બાંધે  પાંખે  બાંધે
અકલવિકલ અંતરને ઓ
સ્વર બાંધે  વિસ્વર બાંધે

ઉપર નીચે કસકસી
ઓ પંડના બાંધે પારકાં બાંધે
અહીંતહીં ઓ ચસચસી
સહુ કોરથી બાંધે

શૂલથી વીંધી ફૂલથી બાંધે
ફૂલથી વીંધી શૂલથી સાંધે

કેમ રે સાંધે
કોણ ઓ અગનબંધ આ બાંધે

- સુંદરજી બેટાઈ