મન મતવાલું માને શેણે?

મન મતવાલું માને શેણે?                        
ઘાવ ઝીલે  એ વજ્જરના  ને ભાંગી પડે મૃદુ વેણે:
                        મન મતવાલું માને શેણે?

સાત  સમંદર  પાર  કરે  ને  ડૂબે  ઝાકળબિન્દુ;
અગ્નિભડકે  બળે નહિ  એ સળગે શીતલ ઈન્દુ.
ઉગ્ર તૃષા  ઓલાશે  ક્યાંથી  છો ઘન વરસે નેણે:
                        મન મતવાલું માને શેણે?

ગિરિવર સરખો બોજ ઉઠાવે, પુષ્પ તળે કચડાતું;
ઝેર ઘૂંટડા  જીરવી  જઈને  અમી છલોછલ પાતું-
આપ ભવોભવ  એ નિષ્ઠુરને  દીધી  વેદના જેણે:
                         મન મતવાલું માને શેણે?
-જયંત પલાણ